കിനാനൂർ - കരിന്തളം ഗ്രാമപഞ്ചായത്ത്

കാസര്‍ഗോഡ് ജില്ലയിലെ വെള്ളരിക്കുണ്ട് താലൂക്കില്‍ പരപ്പ ബ്ളോക്കില്‍ കരിന്തളം, കിനാനൂര്‍, പരപ്പ എന്നീ വില്ലേജുകള്‍  ഉള്‍പ്പെടുന്ന ഗ്രാമപഞ്ചായത്താണ് കിനാനൂര്‍-കരിന്തളം ഗ്രാമപഞ്ചായത്ത്. 77.49 ചതുരശ്ര കിലോമീറ്റര്‍ വിസ്തീര്‍ണ്ണമുള്ള പഞ്ചായത്തിന്റെ അതിരുകള്‍ കിഴക്ക് വെസ്റ്റ് എളേരി പഞ്ചായത്തും, പടിഞ്ഞാറ് മടിക്കൈ, കോടോം-ബേളൂര്‍ പഞ്ചായത്തുകളും, വടക്ക് ബളാല്‍, കോടോം ബേളൂര്‍ പഞ്ചായത്തുകളും, തെക്ക് കയ്യൂര്‍-ചിമേനി, നീലേശ്വരം പഞ്ചായത്തുകളുമാണ്. കിഴക്കു പടിഞ്ഞാറ് നീണ്ടുകിടക്കുന്ന ഭൂമിയുടെ ദൂരം ഏകദേശം 25 കിലോമീറ്റര്‍ വരും. തെയ്യം കലകളുടെയും, പൂരക്കളിയുടെയും, നാടന്‍പാട്ടുകളുടെയും, കോല്‍ക്കളിയുടെയും ശബ്ദമധുരിമയും കലാവൈദഗ്ദ്ധ്യവും നിറഞ്ഞു നില്‍ക്കുന്ന കിനാനൂര്‍-കരിന്തളം പഞ്ചായത്തിന് ഉല്‍കൃഷ്ടമായൊരു സാംസ്കാരിക പാരമ്പര്യമുണ്ട്.  ഗ്രാമ മനസ്സിനെ ഉണര്‍ത്തുകയും ആഹ്ളാദം കൊള്ളിക്കുകയും ചെയ്യുന്ന മുഖ്യ കേന്ദ്രങ്ങളായി ക്ഷേത്രങ്ങളും പള്ളികളും ഇന്നും നിലകൊള്ളുന്നു. പഞ്ചായത്തിന്റെ വിവിധ ഭാഗങ്ങളില്‍ മുസ്ളീം പള്ളികളും, ക്രിസ്ത്യന്‍ ചര്‍ച്ചുകളും മതസൌഹാര്‍ദ്ദത്തിന്റെ പ്രതീകമെന്നോണം നിലനില്‍ക്കുന്നു. കമ്മാടം മുസ്ളീം പള്ളിയില്‍ നടക്കാറുള്ള ചടങ്ങുകളില്‍ ഇതര വിഭാഗങ്ങളുടെ സാന്നിദ്ധ്യം ശ്രദ്ധേയമാണ്. സംഗീതത്തിലുള്ള പാടവവും മെയ്യഭ്യാസത്തിലുള്ള മികവും ഈ ക്ഷേത്രകലയിലൂടെ തെളിയുന്നു.  തുലാം പത്തിന് ശേഷം അമ്പലങ്ങളിലും, ക്ഷേത്രങ്ങളിലും, തറവാടുകളിലും തെയ്യം എന്ന കലാരൂപം കെട്ടിയാടുന്നു. ഗ്രാമീണ തനിമ നിറഞ്ഞുനില്‍ക്കുന്ന ഈ കലാരൂപം നാടിന്റെ സാംസ്കാരിക പൈതൃകം വിളിച്ചോതുന്നു. കിനാനൂര്‍ കിരാതേശ്വര ക്ഷേത്രം, കരിന്തളം കളരിയാല്‍ ഭഗവതിക്ഷേത്രം, ബിരിക്കുളം മുത്തപ്പന്‍ തൊട്ടി, കാറളം ചാമുണ്ടേശ്വരി ക്ഷേത്രം തുടങ്ങി തെയ്യങ്ങള്‍ കെട്ടിയാടാറുള്ള നിരവധി ക്ഷേത്രങ്ങള്‍ ഇവിടെയുണ്ട്. 1948-ല്‍ രൂക്ഷമായ പട്ടിണിയുടെ നാളുകളില്‍ കരിന്തളം ജന്മിയുടെ പത്തായപ്പുരയിലേക്ക് മാര്‍ച്ച് ചെയ്ത കര്‍ഷകര്‍ ജന്മിയുടെ പക്കല്‍ നിന്ന് പത്തുപറ നെല്ല് അളന്നുവാങ്ങി വിതരണം ചെയ്തു. ഈ പഞ്ചായത്തിലെ ജന്മിത്വവിരുദ്ധ പോരാട്ടത്തിലെ ഉജ്ജ്വലമായ ഈ സംഭവം കരിന്തളം നെല്ലെടുപ്പ് സമരമെന്നറിയപ്പെടുന്നു.

ചരിത്രം

ബ്രിട്ടീഷ് ഭരണകാലത്ത് മദ്രാസ് പ്രവിശ്യയിലെ തെക്കന്‍ കാനറാ ജില്ലയുടെ ഭാഗമായിരുന്നു കിനാനൂര്‍-കരിന്തളം പഞ്ചായത്തിലെ പ്രദേശങ്ങള്‍ ഉള്‍പ്പെട്ട പഴയ കാസര്‍ഗോഡ് താലൂക്ക്. 1663-ലും 1667-ലും ഡച്ചുകമ്പനി കോലത്തിരിയുമായി സഖ്യമുണ്ടാക്കിയപ്പോള്‍ നീലേശ്വരം രാജാവിന്റെ അധീനതയിലായിരുന്ന കിനാനൂര്‍ ഡച്ച് സങ്കേതമായിരുന്നു എന്നും അവര്‍ കുരുമുളകും മറ്റ് സുഗന്ധവ്യജ്ഞനങ്ങളും പുഴമാര്‍ഗ്ഗം കൊണ്ടുപോയിരുന്നു എന്നും വില്യം ലോഗന്‍ മലബാര്‍ മാനുവലില്‍ രേഖപ്പെടുത്തിയിട്ടുണ്ട്. 1960-ലെ കേരള പഞ്ചായത്ത് ആക്ട് അനുസരിച്ച് കിനാനൂര്‍ ഗ്രാമവും കരിന്തളം ഗ്രാമവും ചീമേനി ഗ്രാമത്തിലെ കാര്യങ്കോട് പുഴയുടെ വടക്കുഭാഗത്തുള്ള ഭാഗങ്ങളും ചേര്‍ത്ത് കിനാനൂര്‍-കരിന്തളം പഞ്ചായത്ത് 1962-ല്‍ രൂപീകൃതമായി. 1962-വരെയും ഈ പ്രദേശങ്ങള്‍ കിനാനൂര്‍, കരിന്തളം, ചീമേനി ഗ്രാമപഞ്ചായത്തുകളിലാണ് ഉള്‍പ്പെട്ടിരുന്നത്. 1956-ല്‍ മദ്രാസ് വില്ലേജ് പഞ്ചായത്ത് ആക്ട് അനുസരിച്ച് രൂപംകൊണ്ട ഗ്രാമപഞ്ചായത്തുകളാണിവ. ഈ ഗ്രാമപഞ്ചായത്തുകള്‍ക്ക് ഗ്രാമകോടതികളുടെ ചുമതല കൂടി ഉണ്ടായിരുന്നു. ആളുകളെ സമന്‍സ് അയച്ച് വരുത്തി കേസ് തീര്‍പ്പുണ്ടാക്കാനും വിധി നടപ്പിലാക്കാനുമുള്ള അധികാരാവകാശങ്ങളും ഇതനുസരിച്ച് ഉണ്ടായിരുന്നു. 1799-ല്‍ ബ്രിട്ടീഷ് ഇന്ത്യയുടെ ഭാഗമായിത്തീര്‍ന്നതോടെ ജന്മിമാര്‍ പാട്ടം പിരിവ് തുടങ്ങി. നാട്ടിന്‍പുറങ്ങളില്‍ ബ്രിട്ടീഷു വാഴ്ചയുടെ നെടുംതൂണുകള്‍ ജന്മിമാരായിരുന്നു. കര്‍ഷകന്റെ അജ്ഞത മുതലെടുത്ത് സര്‍ക്കാര്‍ ഭൂമിയില്‍ നിന്നുപോലും അവരോട് പാട്ടം ഈടാക്കി. ഐതിഹ്യ കഥയുടെ പിന്‍ബലത്തോടെ മഹത്വമവകാശപ്പെടുന്ന പ്രദേശങ്ങളാണ് കിനാനൂരും കരിന്തളവും. മതസൌഹാര്‍ദ്ദത്തിന്റെ ഉത്തമ ദൃഷ്ടാന്തമാണ് ഇവിടുത്തെ  കമ്മാടം പള്ളി. കിരാതന്‍ (ശിവന്‍) കണ (പാശുപതാസ്ത്രം) ഊരിയ പ്രദേശമാണ്  കിനാനൂര്‍ എന്ന് പറയപ്പെടുന്നു. ഇവിടുത്തെ ക്ഷേത്രപ്രതിഷ്ഠയും ഇതുതന്നെ. കരിമ്പാറപ്പരപ്പിന്‍ നടുവിലെ ഐശ്വര്യദേവതയുടെ നൃത്തശാലയാണത്രെ കരിന്തളം. കരിന്തളത്തെ കളരി ഏറെ പഴക്കം ചെന്നതും പ്രസിദ്ധവുമാണ്. ആരാധനയിലും ഉല്‍സവ നടത്തിപ്പിലുമെല്ലാം സവിശേഷത പുലര്‍ത്തുന്ന കമ്മാടം പള്ളി എക്കാലവും ഹിന്ദു-മുസ്ളീം മൈത്രിയുടെ സംഗമ വേദികൂടിയായിരുന്നു. ഈ പള്ളിയുടെ വാസ്തുവിദ്യയും ത്രിസന്ധ്യകളില്‍ തെളിക്കുന്ന ചുറ്റു വിളക്കുകളുടെ തിരിനാളങ്ങളും  മൈത്രിസന്ദേശമാണ് ചുരത്തി നില്‍ക്കുന്നത്. നെരോത്തെ ഹിന്ദു തറവാട്ടിലെ കളിയാട്ടവും കമ്മാടം പള്ളി നേര്‍ച്ചയും പരസ്പരം മൈത്രിബന്ധം പുലര്‍ത്തുന്ന ഉല്‍സവങ്ങളാണ്. പുല്‍മേടുകളും കാടും നിറഞ്ഞ പ്രദേശങ്ങളില്‍ ജനവാസം കുറവായിരുന്നു. കാടുകള്‍ വെട്ടിത്തെളിച്ച് പുനകൃഷിനടത്തി ഭക്ഷ്യാവശ്യങ്ങള്‍ നിറവേറ്റി പിന്നീട് കുരുമുളകും, കശുമാവും തെങ്ങും കവുങ്ങുമെല്ലാം വിളഭൂമികളില്‍ കുടിപാര്‍ത്തു. ജാതീയമായ തരംതിരിവും ഇവിടെ ശക്തമായിരുന്നു. അയിത്തവും തൊട്ടുകൂടായ്മയും തീണ്ടിക്കൂടായ്മയും ജാതിയടിസ്ഥാനത്തിലുള്ള തൊഴില്‍വിഭജനവും ഇവിടേയും നിലനിന്നുപോന്നു. ഭൂവുടമസ്ഥതാവകാശം ഏറെ കേന്ദ്രീകൃതമായിരുന്നു. പഞ്ചായത്തിലെ 70 ശതമാനം കൃഷിഭൂമിയും 23 പേരുടെ കൈവശമായിരുന്നുവെന്ന് 1960-ലെ വില്ലേജ് രേഖകള്‍ വ്യക്തമാക്കുന്നു. 1937-ല്‍ കീഴ്മാലയില്‍ കര്‍ഷകസംഘം രൂപീകരിച്ചതായി ആണ്ടലാട്ടിന്റെ രേഖയില്ലാത്ത ചരിത്രം എന്ന പുസ്തകത്തില്‍ പറയുന്നു. ചരിത്ര പ്രസിദ്ധമായ കയ്യൂര്‍ സമരത്തിലും ചീമേനി തോലും വിറകും സമരത്തിലും പ്രതികളായവരില്‍ കിനാനൂര്‍-കരിന്തളം പഴയ ചീമേനി ഗ്രാമങ്ങളിലെ പ്രവര്‍ത്തകരുമുണ്ടായിരുന്നു. വിദ്യാഭ്യാസരംഗത്ത് എഴുത്താശാന്‍മാരുടെ സ്ഥാനത്ത് കഴിഞ്ഞ നൂറ്റാണ്ടിന്റെ ആദ്യപദത്തില്‍ തന്നെ പാഠശാല കിനാനൂരില്‍ രൂപം കൊണ്ടു. അമ്പതുകളിലാണ് ഗ്രന്ഥശാലകള്‍ ആരംഭിച്ചത്.