കാസര്ഗോഡ് ജില്ലയിലെ വെള്ളരിക്കുണ്ട് താലൂക്കില് പരപ്പ ബ്ളോക്കില് ഉള്പ്പെടുന്ന ഗ്രാമപഞ്ചായത്താണ് വെസ്റ്റ് എളേരി ഗ്രാമപഞ്ചായത്ത്. 77.45 ചതുരശ്ര കിലോമീറ്റര് വിസ്തീര്ണ്ണമുള്ള പഞ്ചായത്തിന്റെ അതിരുകള് വടക്ക് ബളാല് പഞ്ചായത്തും, തെക്ക് പെരിങ്ങോംവയക്കര (കണ്ണൂര്), കയ്യൂര് ചീമേനി പഞ്ചായത്തുകളും, പടിഞ്ഞാറ് കയ്യൂര് ചീമേനി, കിനാനൂര്കരിന്തളം പഞ്ചായത്തുകളും, കിഴക്ക് ബളാല്, ഈസ്റ്റ് എളേരി പഞ്ചായത്തുകളുമാണ്. 1953-ലാണ് വെസ്റ്റ് എളേരി ഗ്രാമപഞ്ചായത്തിലെ ആദ്യത്തെ ജനകീയ ഭരണസമിതി നിലവില് വന്നത്. കൈപൊക്കി വോട്ടിലൂടെ പ്രസിഡന്റിനെ ജനങ്ങള് നേരിട്ട് തെരഞ്ഞെടുത്തിരുന്നു. അട്ടക്കാട് പൈനി ചാത്തുനായരാണ് ആദ്യത്തെ പ്രസിഡന്റ്. 1963-ല് വെസ്റ്റ് എളേരി, ഈസ്റ്റ് എളേരി പഞ്ചായത്തുകള് ഒന്നിച്ച് എളേരി പഞ്ചായത്തായിരുന്നു. ചിറ്റാരിക്കാല് ആയിരുന്നു ആസ്ഥാനം. കുന്നുകളും മലകളും നിറഞ്ഞ ഭൂപ്രദേശമാണ് വെസ്റ്റ് എളേരി ഗ്രാമപഞ്ചായത്തിനുള്ളത്. പശ്ചിമഘട്ടത്തുനിന്നാരംഭിച്ച് ചെറുപുഴ വഴി ഒഴുകി വരുന്ന കാക്കടവ് പുഴ ഗ്രാമപഞ്ചായത്തിന്റെ തെക്കന് അതിര്ത്തിയെ തഴുകികൊണ്ട് വീണ്ടും പടിഞ്ഞാറോട്ടൊഴുകി തേജസ്വിനി പുഴയായി വികാസം പ്രാപിക്കുന്നു. അതിന്റെ സമീപത്തായി 900 ഏക്കറോളം വരുന്ന സര്ക്കാര് വക നിബിന്ധവനങ്ങള് നിറഞ്ഞ ആക്കച്ചേരി ഫോറസ്റ്റ്. കാക്കടവ് പുഴയുടെ മറുഭാഗത്ത് കണ്ണൂര് ജില്ലയുടെ പെരിങ്ങോം-വയക്കര പഞ്ചായത്ത്. വടക്കന് അതിര്ത്തിയില്കൂടി വെസ്റ്റ് എളേരിയിലേക്ക് പ്രവേശിക്കുന്ന ചൈത്രവാഹിനിപ്പുഴ പഞ്ചായത്തിന്റെ ഹൃദയഭാഗങ്ങില് തെളിനീരൊഴുക്കിക്കാണ്ട് മുക്കട ചെന്ന് തേജസ്വനി പുഴയില് വിലയം പ്രാപിക്കുന്നു. കോട്ടമലയിലും, കാവുന്തലയിലും സര്ക്കാര് വക നിക്ഷിപ്ത വനപ്രദേശം. കിനാനൂര് കരിന്തളം പഞ്ചായത്തിനോടു ചേരുന്ന ഭാഗത്ത് പരപ്പച്ചാലും പീലാച്ചിക്കര ഫോറസ്റ്റും മനോഹരമായ താഴ്വരകളും. ഇതെല്ലാം ചേര്ന്നാല് വെസ്റ്റ് എളേരി പഞ്ചായത്തിന്റെ ഏകദേശ മുഖചിത്രം ആകും. സമുദ്രനിരപ്പില് നിന്നും ഏറെ ഉയര്ന്ന് നില്ക്കുന്ന ഭൂപ്രദേശമാണ് വെസ്റ്റ് എളേരിയുടേത്. അതുകൊണ്ട് തന്നെ പടിഞ്ഞാറന് തീരപ്രദേശത്തിന്റേതില് നിന്നും വളരെ വ്യത്യസ്തമായ മണ്തരമാണ് ഇവിടെ അധികവും കാണുന്നത്. അറക്കത്തട്ടു മുതല് പരപ്പച്ചാല് വരെയും കാക്കടവു മുതല് ചെരുമ്പക്കോട് വരെയും കൂരാംകുണ്ട് മുതല് ചെമ്മരങ്കയം വരെയും വ്യാപിച്ചു കിടക്കുന്ന വെസ്റ്റ് എളേരി ഗ്രാമപഞ്ചായത്തിന് കമ്മാടത്തമ്മയുടെയും പെരുമ്പട്ട ഉറൂസിന്റെയും ചരിത്രമാണ് ഉള്ളത്. ജന്മിമാരുടെ അധികാരക്കുടക്കീഴില് നാടന്കലകളും ഒപ്പം സംസ്ക്കാരവും കിളിത്ത് വന്നു എന്ന് ഐതിഹ്യം. തെക്കേകോവിലകം, കോട്ടയില് വീട്, ഏച്ചിക്കാനം, കോണത്ത് വീട്, ഉദിനൂര് ദേവസ്വം, കിണാവൂര് കോവിലകം തുടങ്ങിയ ജന്മിമാരുടെ കീഴില് എളേരി, മൌവ്വേനി, പറമ്പ, കമ്മാടം, പ്ളാച്ചിക്കര, അടുക്കളക്കണ്ട് എന്നിവിടങ്ങളിലെ ക്ഷേത്രങ്ങളും ഉത്സവങ്ങളും നാടിന്റെ ചരിത്രസംസ്കൃതിയ്ക്ക് നല്കിയ സംഭാവന വലുതാണ്. ഇവ കൂടാതെ ചെറുതും വലുതുമായി അനേകം ആരാധനാലയങ്ങള് വേറെയുണ്ട്. കുന്നുംകൈ കിഴക്കേക്കര മഖാമില് ഉറൂസ് നടക്കുമ്പോഴും കോളിയാട് ക്ഷേത്രത്തില് ഉത്സവം നടക്കുമ്പോഴും പരസ്പരം സഹകരണം നിലനിന്നിരുന്നു. പഞ്ചായത്തിലെ ഏറ്റവും പഴക്കം ചെന്ന മുസ്ളീംപള്ളി പെരുമ്പട്ട പള്ളിയാണ്. മൌവ്വേനി പള്ളിയാണ് പഞ്ചായത്തിലെ ആദ്യത്തെ ക്രിസ്തീയ ആരാധനാലയം. ഹൈന്ദവ, ക്രൈസ്തവ, മുസ്ളീം മതവിഭാഗങ്ങള് പരസ്പര സ്നേഹത്തിലും സാഹോദര്യത്തിലും ഐക്യത്തിലും കഴിയുന്ന പഞ്ചായത്താണ് വെസ്റ്റ് എളേരി. പറമ്പ, ചാമുണ്ടിക്കാവ്, നാട്ടക്കല് മാരിയമ്മന്കാവ്, വരക്കാട് കാവ്, മൌക്കോട് കാവ്, കാവന്തലകാവ്, കമ്മാടംകാവ് എന്നീ കാവുകളില് കമ്മാടം കാവ് അത്യപൂര്വ്വമായ ഔഷധങ്ങള്ക്കും ചിത്രശലഭങ്ങള്ക്കും പേരുകേട്ടതാണ്. തുലാം 10 കഴിഞ്ഞാല് സജീവമാകുന്ന ക്ഷേത്രങ്ങളും മാനവസ്നേഹത്തിന്റെ ഉത്കൃഷ്ട കേന്ദ്രങ്ങളായ മുസ്ളീം-ക്രിസ്ത്യന് പള്ളികളും ഈ പ്രദേശത്തെ വളരെയേറെ സ്വാധീനിച്ചിട്ടുണ്ട്. നാടന് കലാരൂപങ്ങളായ തെയ്യങ്ങളും നാടന് പാട്ടുകളും തോറ്റങ്ങളും കോല്ക്കളിയും തുടികൊട്ടിക്കളിയും ആചാരക്കളിയും എല്ലാം ഈ പഞ്ചായത്തിന്റെ ഹൃദയത്തുടിപ്പുകള് തന്നെ.
ചരിത്രം
പഴയ മദ്രാസ് സംസ്ഥാനത്തില്പ്പെട്ട തെക്കന് കര്ണ്ണാടക ജില്ലയുടെ തെക്കുഭാഗത്തെ താലൂക്കായ വെള്ളരിക്കുണ്ട് കിഴക്കന് ഗ്രാമമായ എളേരിയാണ് വെസ്റ്റ് എളേരി ഗ്രാമപഞ്ചായത്ത്. പുരാതനകാലം തൊട്ടേ സംസ്ക്കാര സമ്പന്നമായ ഒരു സമൂഹം ഈ പഞ്ചായത്തില് അധിവസിച്ചിരുന്നു. പാറയില് കൊത്തിയുണ്ടാക്കിയ ശിലാഗുഹകള്, പറമ്പ ശ്രീരാമക്ഷേത്രാവശിഷ്ടം, കമ്മാടം ക്ഷേത്രം, ഭീമനടി പൂക്കാട് കാവിന്റെ ക്ഷേത്രാവശിഷ്ടം, അട്ടക്കാട് കുളങ്ങര ഭഗവതി ക്ഷേത്രാവശിഷ്ടം, കുന്നുംകൈ കിഴക്കേക്കര മഖാം, പെരുമ്പട്ട മഖാം, മുസ്ളീംപള്ളി രേഖകള്, ആക്കച്ചേരി വനത്തിലെ വീടുകളുടെ അവശിഷ്ടങ്ങള് എന്നിവ പഞ്ചായത്തിന്റെ സാംസ്ക്കാരിക തനിമയുടെ തെളിവുകളാണ്. തെക്കേ കോവിലകം (എളേരി) കിണാവൂര് കോവിലകം (മൌവ്വേനി), ഉദിന്നൂര് ദേവസ്വം, ഏച്ചിക്കാനം, കോണത്ത് വീട്, മാക്കരംകോട്ട് കുണ്ടലായര്, കോട്ടയില് വീട്, ഉടുംമ്പുന്തല ഹാജിയാര്, വേലിക്കോത്ത് കുടുംബം, കാക്കടവത്ത് പള്ളിക്കാല് കുടുംബം തുടങ്ങിയ ജന്മികുടുംബങ്ങളാണ് ആദ്യകാലത്ത് പഞ്ചായത്തിലെ വിവിധ പ്രദേശങ്ങള് അടക്കിവാണിരുന്നത്. പാവപ്പെട്ട കൃഷിക്കാര് ഇവരുടെ കുടിയാന്മാരായിരുന്നു. പരമ്പരാഗതമായി കാര്ഷികവൃത്തിയും ജാതീയമായ കുലത്തൊഴിലുകളും ഇവിടെയുണ്ടായിരുന്നു. മേടം ഒന്നിന് (വിഷു) പോത് കൊള്ളലും തുലാം പത്തിന്റെ പത്താതയും ഇതിന്റെ ഭാഗമായിരുന്നു. പഞ്ചായത്തിലെ പ്രധാന ആദിവാസി സമൂഹങ്ങള് മാവിലന്, കുടിവേട്ടുവന്, പെരിങ്ങാരവേട്ടുവന് എന്നീ വിഭാഗത്തില്പ്പെട്ടവരായിരുന്നു. ആദ്യകാലത്ത് ഇവര്ക്ക് മാറ് മറയ്ക്കാനോ, നിവര്ന്ന് നടക്കാനോ അവകാശമില്ലായിരുന്നു. സ്ത്രീകള് നിര്ബന്ധമായും കല്ലമാല ധരിക്കണം. ഭാര്യഭര്ത്താക്കന്മാരായ ഒരു ജോഡി താഴ്ന്നജാതിക്കാരെ 12 പറ നെല്ല് വാര്ഷിക പാട്ടം നിശ്ചയിച്ച് ജന്മിമാര് എല്ലാവര്ഷവും ധനുമാസം 10-ന് കര്ഷകര്ക്ക് പണയപ്പെടുത്തിയിരുന്നു. ജന്മിക്ക് നെല്ല് ഇടത്തരം കൃഷിക്കാരന് ഒരു ജോഡി അടിമകളും നവദമ്പതികളായ പട്ടികജാതിക്കാര് ജന്മിയുടെ വീട്ടിലെത്തി ആചാരക്കളി നടത്തണം. 12 പറ നെല്ല് ജന്മി ആണിന് കൊടുക്കും. അത് വാങ്ങുന്നതോടെ പെണ്ണും ജന്മിയുടെ അടിമയായി. കൂടാതെ മുണ്ടും പുടവയും കൊടുക്കും. ജനനമരണങ്ങള് ജന്മിയെ അറിയിക്കണം. കുഞ്ഞിന് പേര് വിളിക്കാനുള്ള അവകാശം പോലും ജന്മിക്കാണ്. പുനകൃഷി ചെയ്തുവന്ന കര്ഷകര് മറ്റൊരു ജീവിത ഉപാധിയായി കണ്ടത് നായാട്ട് ആയിരുന്നു. എളേരിത്തട്ട് കൂലോം കേന്ദ്രമാക്കിയാണ് നീലേശ്വരം തെക്കേ കോവിലകത്തിന്റെ വകയായുള്ള എളയടത്ത് ചേരിക്കല്ല് ഭരണം നടത്തിയിരുന്നത്. ഈ പഞ്ചായത്ത് നൂറ്റാണ്ടുകള്ക്കുമുമ്പ് തന്നെ ഹിന്ദു-മുസ്ളീം സൌഹൃദത്തിന്റെ ചരിത്ര ഭൂമിയായിരുന്നു. കോളിയാട് ചാമുണ്ഡേശ്വരിക്ഷേത്രത്തില് നിന്നാണ് കുന്നുംകൈ കിഴക്കേക്കര പള്ളി (മഖാം) ഉറൂസിനുവേണ്ട ആദ്യപണം കൊടുക്കുന്നത്. ഉറൂസുമായി ബന്ധപ്പെട്ട നായാട്ടില് ഇരുവിഭാഗങ്ങളും പങ്കെടുത്തിരുന്നു. പെരുമ്പട്ട മഖാം ഉറൂസിനും തായത്തിടം ക്ഷേത്രത്തിലെ ഉത്സവത്തിനും ആചാരപരമായ ബന്ധം ഇന്നും നിലനില്ക്കുന്നു. പഞ്ചായത്തിലേക്ക് കാര്യങ്കോട് പുഴയിലൂടെ ചീനയില് നിന്നാണ് ജനങ്ങള് എത്തിചേര്ന്നത് എന്ന് പറയപ്പെടുന്നു. പരുമ്പട്ട, മുക്കട, കുന്നുംകൈ എന്നിവിടങ്ങളിലാണ് ആദ്യകാല വ്യാപാരകേന്ദ്രങ്ങള്. മലഞ്ചെരിവുകളിലെ കാട് തെളിച്ച് പുനം കൃഷി ചെയ്ത് ജീവിക്കുന്ന കുടിയാന്മാരായിരുന്നു ഭൂരിഭാഗം കൃഷിക്കാരും. നാണ്യ വിളയായി വന് കുരുമുളക് തോട്ടങ്ങള് ഉണ്ടായിരുന്നു. 1940-കളില് തെക്കന് തിരുവിതാംകൂറില് നിന്നും പഞ്ചായത്തിലേക്ക് കുടിയേറ്റം തുടങ്ങി. കപ്പയും (മരച്ചീനി) റബ്ബറും, കുരുമുളകും തെങ്ങും പോലെ പ്രധാന വിളകളായി. വെസ്റ്റ് എളേരി ഗ്രാമപഞ്ചായത്തില് എളേരി വില്ലേജില് 425.84 ഹെക്ടര് റിസര്വ് വനവും, ഭീമനടി വില്ലേജില് 663.95 ഹെക്ടര് റിസര്വ് വനവും ഭീമനടി വില്ലേജില് 54 ഏക്കര് 77 സെന്റ് റവന്യൂ വനവും (കമ്മാടം കാവ്) ഉണ്ടെന്ന് ബന്ധപ്പെട്ട വകുപ്പിന്റെ കണക്കുകള് സൂചിപ്പിക്കുന്നു. എളേരി വില്ലേജില് ഉള്ള നിക്ഷിപ്ത വനം വളഞ്ഞങ്ങാനം (കോട്ടമല) ഫോറസ്റ്റ് എന്നും, ഭീമനടി വില്ലേജിലേത് ആക്കച്ചേരി റിസര്വ് വനം എന്നും അറിയപ്പെടുന്നു. ഭീമനടി വില്ലേജിലെ റവന്യൂ വനം കമ്മാടം കാവ് എന്നും അറിയപ്പെടുന്നു. വനത്തില് വിലപിടിപ്പുളള മരങ്ങളും മുള, ചൂരല്, ഓട എന്നിവയും അത്യപൂര്വ്വമായ ഇനം പച്ചമരുന്നുകളും ധാരാളം കാണാം.
COMMENTS